Собраниската Комисија за економски прашања денеска ги прифати во прво читање дополнувањето на Законот за техничка инспекција и измените на Законот за Државен пазарен инспекторат.
Со предлог дополнувањето на Законот за техничка инспекција се предлага проширување на надлежностите на инспекцијата и во делот на работните односи.
– Се работи за мали, но по својата суштина мошне значајни дополнувања на Законот. Се предлага освен надлежностите што ги има техничката инспекција да и се доверат и надлежности во делот на работните односи и во делот на преземање на мерки при констатирани неправилности во однос на пријавување на работниците и во однос на задолжителното социјално осигурување, образложи Анета Димовска од Министерството за економија.
За пратениците се работи за важни промени со кои се очекува да се обезбеди поголема сигурност на работниците.
– Се проценува дека 152 илјади лица се неформално вработени и би требало со овие измени тоа да се дорегулира, истакна Ѓорѓи Коџобашиев.
Со Предлог-измените на Законот за Државен пазарен инспекторат се создава основа Инспекторатот да врши и надзор над преземените обврски на работодавачот во однос на пријавувањето на работникот и неговото задолжително социјално осигурување. Доколку се констатираат неправилности, Инспекторатот согласно законот ќе може да преземе соодветни мерки.
