Анкетната комисија за прислушувањето денеска треба да ја продолжи првата седница, која пред два дена беше прекината откако пратениците од владејачките партии побараа координација за усогласување на деловникот за работа.
Се очекува членовите на Анкетната комисија денеска да го изгласаат деловникот за работа, што е и единствена точка на дневен ред на оваа седница.
За првичниот текст на Предлог-деловникот, што претседателот на Комисијата Петре Шилегов го достави до пратениците, на седницата во вторникот беа изнесени низа забелешки по што беше побарано дополнително време за негово усогласување.
Анкетната комисија за прислушувањето е формирана согласно договорот од Пржино. Поддржана е од четирите партии ВМРО-ДПМНЕ, СДСМ, ДУИ и ДПА кои учествуваат во разговорите за излез од политичката криза, а со одлука на Собранието ја сочинуваат 16 члена.