Градоначалникот на Демир Капија Трајче Димитриев денеска информира дека е почната реконструкцијата на водоводната линија во должина од 8.558 метри.
– Со реконструкцијата на водоводната мрежа се заменуваат азбестните цевки со нови полиетиленски. Истовремено се зголемува профилот на водоводните цевки во мрежата. Главна цел на овој проект е во секое време во секој дел на градот да има доволно вода за пиење со соодветен притисок и доволно вода за хидрантите во случај на пожар, објасни Димитриев.
Проектот е финансиран од Европската инвестициска банка во висина од 336.894 евра обезбедени преку Министерството за транспорт и врски и со дополнителни финансиски средства обезбедени од буџетот на општина Демир Капија во висина од милион и 500 илјади денари.
Се очекува со овој проект Демир Капија да обезбеди доволно вода за пиење во наредните 50 години.