Екипите на ЈП „Улици и патишта“, по налог на Град Скопје, деновиве ги нивелираат канализациските шахти на градските улици и булевари.
Како што соопшти Град Скопје, во текот на градежните работи, се отстранува оштетениот материјал околу шахтите, се поставуваат нови капаци, коишто се армираат и потоа се бетонираат.
Во изминативе две недели нивелирани се дваесетина канализациски шахти и на нив се поставени нови капаци, и тоа на улиците „Димитрие Чуповски“, „Франклин Рузвелт“, „Никола Парапунов“, „Христо Татарчев“, „Алија Авдовиќ“, „16. Македонска бригада“ и на булеварите „Александар Македонски“ и „Илинден“.
Од Град Скопје посочпуваат дека акцијата за нивелирање на канализациските шахти на градските улици продолжува и во наредните денови, а екипите на ЈП „Улици и патишта“ ќе интервенираат на сите локации каде што ќе се јави потреба.
