Националната установа Национален парк „Пелистер“-Битола почна да ја применува одлуката на управниот одбор и менаџментот на таа установа со која од денеска се наплатува влезот во националниот парк.
Наплатата ја вршат вработените кои издаваат уредна потврда, а собраните средства ќе се користат за непрофитни цели, односно ќе се реинвестираат во туристичката понуда на националниот парк, истакна Пеце Цветановски, задолжен за односи со јавност од таа установа.
– Од денеска, 1-ви мај, се наплаќа влезница со паркинг и тоа се однесува само на посетителите кои користат автомобили, комбиња и автобуси. Влезницата чини 50 денари за гостите кои во паркот сакаат да престојуваат со свој автомобил и моторциклистите, 80 денари чини влезот со комбе до 20 седишта и 150 денари за автобуси. Собраните средства ќе се реинвестираат за инфраструктура, еколошка и хигиенска потреба, како и за подобрување на туристичката понуда, истакна Цветановски.
Од НУ Национален парк „Пелистер“-Битола информираат дека во следна фаза ќе биде воведено и наплаќање и за кампирање во паркот, но претходно треба да се создадат услови за таа услуга.
