„Денес, ова нереформирано ВМРО-ДПМНЕ нејверојатно е единствениот политички субјект што не знае дека во светот со месеци се случуваат здравствена и економска криза поради коронавирусот. Како и сите други држави погодени од кризата така и Северна Македонија мораше да обезбеди капитал однадвор за полесно справување со последиците од кризата, за да се обезбеди ликвидност во време на светска пандемија и за да се направи фискален простор за дејствување и преземање на антикризни мерки“, се вели во соопштението на СДСМ, како реакција на прес-конференцијата на ВМРО-ДПМНЕ од каде изјавија дека за само три месеци Владата го зголемила јавниот долг за една милијарда евра.
Од партијата велат дека еврообврзницата и заемот од Меѓународниот монтерен фонд се земени со потпис од дополнителната заменичка министерка за финансии, Гордана Димитриоска Кочоска кадар на ВМРО-ДПМНЕ, а намената на овие средства е строго утврдена.
„Ништо не се менува во ВМРО-ДПМНЕ, оваа партија нема ниту желба ниту волја да се реформира. Последен доказ за тоа е денешниот настап на Анастасија Илиеска, една од многу партиски функционерки на ВМРО-ДПМНЕ која е симбол на непотизам. Со таквиот потценувачки однос кон граѓаните, ВМРО-ДПМНЕ уште долго останува во опозиција“, велат од СДСМ.