Она што можам во моментов да го кажам е дека по истекот на рокот на овој повик за пријавување на кандидати за членови на ад-хок телото за следење на медиумите и за главен и одговорен уредник на Македонската радио телевизија пријавени се над 20 кандидати, професионалци, информираше Љупчо Николовски, член на Извршниот одбор на СДСМ.
– Во текот на денот ќе извршиме интензивни консултации и координации со професионалните здруженија на новинарите, со граѓанските здруженија, со невладините организации, по што ќе имаме повеќе детали. Она што во моментов можеме да го кажеме е дека над 20 луѓе, професионалци се имаат пријавено на повикот заклучно со рокот што беше вчера – рече Николовски.
Во сабота истекува рокот во кој СДСМ, ВМРО-ДПМНЕ, ДУИ и ДПА треба да предложат членови за ад хок телото, па се очекува викендот да бидат избрани четворица, кои потоа тие треба да го изберат и петиот член на ова тело.