Единственото нешто што во 2013 година навистина и понатаму ќе продолжи да расте е задолжувањето во странство, смета проф. д-р Ванчо Узунов, претседател на Економско-социјалниот совет на СДСМ.
Што е најлошо, вели тој, ќе расте задолжувањето, пред се, за да се вратат досегашните задолжувања.
– Предлог буџетот не е ништо друго освен еден обид, со извртување на начинот на презентирање на работите, да се сокријат фактите за досегашната лоша економска политика, како и за безидејноста и кукавичлакот за преземање различна економска политика во иднина. Таква која, после 7 години континуирано неслушање на добронамерните совети на стручната јавност и правењето грешки, сега е повеќе од неопходна – вели Узунов.
Тој заклучува дека Буџетот за 2013 година нема да ги решава проблемите од кризата, туку само ќе ги одржува и дека ништо суштински нема да се смени.
– Буџетот повторно предвидува трошење пари на несуштински проекти наместо на капитални инвестиции и инфраструктура. Владата има намера и понатаму да не задолжува и до 2013 година, а политиката без решенија, директно не води во банкрот, сличен на грчкиот. Проекцијата го потврдува фактот дека Македонија ја чека тешка година и ако се земе предвид инфлацијата, граѓаните, бизнисот и севкупно целата држава, Владата проектирала да бидат посиромашни – заклучува Узунов.
Структурата на буџетот е иста како и онаа од 2006 година.
– Овој пат, за наредната година се дава прогноза за умерен раст што треба да звучи како вразумување за разлика од минатите години, особено после фијаското направено со предвидувањата за порастот на БДП за во 2012 година. Но, зад таквата наводна умереност, всушност се кријат повеќе „стапици“ – предупредува тој.
Тој вели дека стапката на раст за оваа година ќе изнесува околу нула. Предвидениот раст за наредната година е 2 отсто, но прашање е дали и тој е остварлив. Буџетот предвидува бруто инвестициите да бидат со стапка од 6 отсто.