За цели 11 години ВМРО-ДПМНЕ не изгради ниту еден метар пруга, не реконструираше ниту еден железнички правец, ниту една железничка станица, регира СДСМ на прес-конференцијата на Наум Стоилковски од ВМРО-ДПМНЕ.
„11 години ВМРО-ДПМНЕ буквално го игнорираше железничкиот транспорт, а протестите и блокирањето на пруги од страна на вработените во железницата беа речиси секојдневие. Затоа, денес ВМРО-ДПМНЕ нема никаков кредибилитет да зборува за железницата.
Денес ВМРО-ДПМНЕ како по навика чека несреќи за да ги злоупотреби во дневно политички цели. Причините за оваа несреќа ќе ги утврдат надлежните институции. Добро е што нема жртви, факт е дека веднаш се реагираше и за брзо оспособување на пругата.
Факт е дека за само две години, Владата предводена од СДСМ направи многу повеќе за железницата отколку ВМРО-ДПМНЕ за 11 години.
За само две години: Се изгради пругата Битола-Кременица. Се гради пругата Куманово – Бељаковце, а во подготовка е пругата Бељаковце – Крива Пaланка. Реконструирани се 10 железнички станици, а 2,5 милиони евра се наменети за реконструкција на железничката станица во Скопје.
Потпишан е Договор за грант во висина од 68,6 милиони евра со Европската банка за обнова и развој, преку Инвестициската рамка на Западен Балкан на Европската Унија, наменет за изградба на железничката пруга за поврзување со Бугарија и со Албанија.
Наместо лажна загриженост ВМРО-ДПМНЕ нека гледа и нека учи како се инвестира и развива железничката инфраструктура.“, се наведува во реакцијата на партијата.