Владата предводена од СДСМ и парламентарното мнозинство докажаа дека институциите можат да работат одговорно, отчетно и во служба на граѓаните, се наведува во денешното партиско соопштение.
– СДСМ, преку Владата што ја предводи и преку парламентарното мнозинство, ги остварува ветувањата дадени пред граѓаните и ги отвори институциите, кои наместо како досега да работат во интерес на Никола Груевски и ВМРО-ДПМНЕ, денес работат во служба на граѓаните, велат од СДСМ.
Оттаму посочуваат дека со Одлука на Владата предводена од СДСМ од 1 септември клучните институции работат двосменско.
– Управата за јавни приходи, Царинската управа, градинките, Управата за водење матични книги и службите за издавање лични карти и пасоши во МВР сега работат до 21:30 часот и им се подостапни на граѓаните, истакнуваат од СДСМ.
Во Министерството за труд и социјална политика, како што посочуваат, воведен е „Отворен ден со граѓаните“, секој петок од 9 до 13 часот.
– Декласифицирани се информациите кои се однесуваат на службени патувања, репрезентации и доделување државна помош за странските компании, а со одлука на Владата, достапни и бесплатни се информациите од Централниот регистар и од Катастарот за новинарите кои работат истражувачко новинарство, се додава во соопштението.
По локалните избори, како што истакнуваат од СДСМ, начелата на отчетност, професионалност и одговорност на Владата ќе важат и на локално ниво, кога и локалните инситуции ќе работат единствено во служба на граѓаните.