Пратеничката група на СДСМ денеска во Собранието достави предлог закон за материјално обезбедување на лицата кои останале без работа поради приватизација на претпријатијата со општествена и државна сопственост.
Со законот се бара сите стечајни работници кои имаат најмалку 15 години на осигурување и 50 години старост за жени и 53 години за мажи да примаат месечен надоместок во висина од 30 проценти од просечно исплатената нето плата по работник во претходната година, односно околу 100 евра.
– Овој закон го поднесуваме во име и на барање на сите оние кој во изминатите 15, 20, 25 или 30 години работеле во македонски компании и кои ја граделе оваа држава и овие институции, изјави Марјанчо Николов, претседател на собраниската Комисија за финансирање и буџет.
СДСМ смета дека преку носењето на ваков закон државата треба да докаже дека навистина е социјална и обезбедува социјална правда и сигурност за своите граѓани. Од партијата бараат Владата да ги пренамени парите од реклами за решавање на проблемот на стечајците.