„Нашата татковина се наоѓа во деликатна фаза со мутацијата на вирусот Ковид-19. Четвртиот бран на вирусот низ кој минуваме, но и антиваксерските лажни вести и дезинформациски кампањи укажуваат на потребата од точно информирање на јавноста за процесот на вакцинација“, соопштува СДСМ.
„За таа цел започна кампањата „За моментите на среќа – Вакцинирај се“. Масовната имунизација е докажано најсигурен начин да ставиме крај на пандемијата, да го сочуваме јавното здравје, но и да им помогнеме на здравствените работници и здравствениот систем.
Сите вакцини го подигаат имунолошкиот систем и штитат од тешки форми на заболувања од вирусот, сите вакцини се еднакво безбедни по здравјето.
Граѓаните треба да покажат одговорност кон сопственото и колективното здравје и да ја искористат можноста да се вакцинираат на еден од вакциналните пунктови.
Истовремено, ВМРО-ДПМНЕ и нивниот лидер Христијан Мицкоски да ги повикаат граѓаните да се вакцинираат наместо да прават евалуација на кампањата и да поддржуваат протести против вакцинација.
Мицкоски и ВМРО-ДПМНЕ треба барем еднаш да покажат одговорност и да ги повикаат членовите на партијата и граѓаните да ги почитуваат мерките за заштита.
Масовната вакцинација да продолжи што позасилено за да ставиме крај на пандемијата и конечно да се вратиме на нормалното функционирање на општеството“, се наведува во соопштението на СДСМ.