Кандидатот за претседател од СДСМ Стево Пендаровски вчера вечер на митингот во Кочани ги повика граѓаните масовно да излезат во вториот изборен круг и да го поддржат во трката за претседател на Република Македонија.
– Триста и триесет илјади гласови се солидни, но не се доволни. Затоа во вториот круг таа бројка да ја удвоиме, да ја направиме 500 илјади гласови, рече Пендаровски.
Пред кочанчани се обрати и лидерот на СДСМ Зоран Заев велејќи дека никој од надвор нема да дојде да и помогне Македонија.
– Затоа мораме ние заедно да го направиме тоа. Македонскиот народ ќе се избори за слобода, демократија и подобар живот на сите во Македонија, додаде Заев.
Тој на митингот во Кочани им се обрати и на гласачите Албанци, но и на политичарите.
– Ова е заедничка земја. Бев и во места каде доминантно живее албанско население. Велат соживот има, живот нема. Се жалат на истите проблеми. Сиромаштија, крпење ден за ден. Сиромаштијата не бира националност, верска припадност, таа е иста за сите. Затоа дозволете им на луѓето да гласаат како што чувствуваат и да изберат промени кои ќе им го подобрат животот, рече Заев.