Нема поголема дрскост, безобразлук и понижување на граѓаните од поставувањето на првите братучеди и кумот за контролори и трошачи на парите на граѓаните. Во поновата политичка историја на Европа, ваков случај на непотизам не е забележан, е реакцијата на СДСМ на соопштението од ВМРО-ДПМНЕ.
„ВМРО-ДПМНЕ, за фирмите на Заеви ги вади истите документи со години наназад, пред секој изборен циклус. Господине Груевски, дали Вашиот братучед, Сашо Мијалков заработил една милијарда евра на грбот на македонските граѓани? И, дали Вие, Мијалков и Ставрески сте мозокот на операцијата во којашто последниве 7 години се одлеани повеќе од 3,5 милијарди евра пари на граѓаните во непознат правец и во приватни џебови“, прашуваат социјалдемократите.