Министерството за здравство не одговори дали постои писмо од Клиниката за ендокринологија во коешто Тодоров и власта на Груевски се предупредени за ризиците од промената на инсулинската терапија – реагираат од СДСМ.
„Министерството за здравство не објасни која е причината за набавената помала количина од потребниот инсулин, со што е доведено во ризик здравјето на 24.000 пациенти, меѓу нив и бремени жени и деца.
Никола Тодоров самиот не е сигурен во чекорот што го презема со замената на инсулинот и безобразно, одговорноста за евентуалните последици оддалеку ја префрлува на самите пациенти. На тоа укажува фактот што Министерството за здравство нагласува дека дијабетичарите требало да се придржуваат кон советите од дијабетолозите за исхраната, физичката активност и неопходните чести контроли на гликемијата.
Ако Тодоров беше сигурен во безбедна замена на инсулинот, зошто во истото ова соопштение тој најавува дека ќе го зголемел бројот на бесплатни ленти за мерење гликемија, од околу 4 ленти месечно на околу 30 ленти месечно за пациентите? СДСМ ја повикува власта на Никола Груевски здравјето на граѓаните да го стави пред интересот за тендерите, а за да ги ослободи дијабетичарите од стресот што им го приреди, веднаш да обезбеди соодветни количини од инсулинот што недостига“ – велат од СДСМ.