Проблемот меѓу Косово и Македонија задава страотен удар на економијата на земјава, а особено на земјоделците и транспортерите. Инсистираме двете влади да покажат посветеност на државните интереси и уште денеска да биде изнајдено решение, рече денеска на прес конференција портпаролот на СДСМ Петре Шилегов.
Во целиот настанат хаос околу ова прашање се случи нешто неверојатно.
Замислете, вели тој, Владата на Никола Груевски која 8-ма година по ред бега од телевизиски дуели и дебати со опозицијата за внатрешните проблеми во државата, предложи решавање на меѓудржавно прашање, преку ТЕЛЕВИЗИСКИ ДУЕЛ со странски министер?!
Несериозно и крајно неодговорно е Владата и премиерот Груевски за домашните прашања да молчат, а за горливи меѓудржавни прашања, да глумат транспарентност.
СДСМ повторно го повикува премиерот, министрите во Владата и функционерите на ВМРО-ДПМНЕ, да соберат храброст и конечно да излезат на јавна медиумска дебата.
Така ќе можеме да ги соочиме фактите за ноќните упади на полицијата и кршењето на човековите права, неразумното трошење буџетски средства, сиромаштијата, евро изолацијата на државата или кој било друг проблем што е реален товар и го засега животот на македонските граѓани, заврши Шилегов.