СДСМ вечерва соопшти дека Централниот одбор (ЦО) на партијата едногласно ги поддржал претседателот Зоран Заев и раководството на партијата за водењето на преговарачки процес за реализација на Договорот од 2 јуни /15 јули.
Централниот одбор на СДСМ едногласно ги поддржа сите номинации за министри и заменици министри: Оливер Спасовски за министер за внатрешни работи, Фросина Ременски за министерка за труд и социјална политика, Александар Кирацовски за заменик министер за информатичко општество и администрација, Кире Наумов за заменик министер за финансии и Љупчо Николовски за заменик министер за земјоделство, шумарство и водостопанство, се наведува во соопштението.
– Јасно е за сите, влегуваме во владата исклучиво како коректив на власта, со цел да обезбедиме гаранции за фер и демократски избори во интерес на граѓаните и на Република Македонија, рекол Заев на состанокот.
Седницата на ЦО, како што се наведува, поминала во исклучително позитивна атмосфера.
ЦО на партијата вечерва го избрал Дамјан Манчевски за шеф на Изборниот штаб на СДСМ.
