Социјалдемократската младина на кејот на Вардар донесе врба од 250 денари, како замена за како што рекоа „речиси овенатата“.
„Со разочарување ја примивмe информацијата дека фамозните милионски жални врби во Вардар се во лоша состојба, а едната е речиси овената. Иако за момент помисливме дека врба од 80 илјади евра не се суши, сепак и таа врба била обична. Затоа одлучивме да преземеме итна превентивна мерка за заштита на државниот буџет и на изгледот на реката Вардар“, рече Дарко Давитковски, претседател на СДММ.
„Ако знаеме дека врбите чинеа 250 илјади евра, а дека власта расипнички ги троши народните пари за се и сешто и ако знаеме дека дека под терминот „уметност“ покриваат огромен криминал, тогаш нашата акција е повеќе од оправдана.
Како што гледате, денеска донесовме една врба. Иста е како овие што се дел од скултурата во Владата но оваа чини само 250 денари. Врбата ја донираме за да спречиме нова неразумна набавка од стотици илјади евра. За да не не изненади власта дека мора да купи нова врба од 80 илјади евра.
Ако евентуално се исушат и другите две дрвја, што е веројатно, бидејќи авторката на делото бараше консултации по форуми на интернет за тоа како да го изведе проектот, ја замолуваме власта да не набавува други, ние ќе донесеме повторно. Ќе сториме се, само немој да пуштате нови 250 илјади евра низ Вардар“, рече Давитковски.