Данска ја поддржува интеграцијата на Македонија во НАТО и ЕУ, но за напредок во преговорите инсистира на резултати од реформите и на принципот на заслуги, порача шефот на данската дипломатија Андерс Самуелсен на заедничката прес-конференција во Скопје со неговиот домаќин, министерот за надворешни работи Никола Димитров.
-Данска ја подржува вашата европска перспектива и вашите аспирации за члнество во НАТО . Исто така подвлековме дека напредокот во преговорите ќе следува само по реформите и врз основа на пристапот на заслуги. Овој процес треба да се консолидира и да се испорачаат натамошни резултати, најмногу во борбата против корупцијата и реформите на јавната администрација. Позитивниот моментум во вашата земја постои и треба да се одржи. Пазарните економии можат да функционираат само ако имате јавни институции кои функционираат и правен систем, и ако постои доверба во раздавањето на правдата, рече Самуелсен.
Тој подвлече дека фокусот треба да биде ставен на реформите, а ги поздрави и напорите на Владата за а решавање на спорот за името.
-Договорот од Преспа, беше тежок компромис и за двете страни и тоа го препознаваме, рече Самуелсен
Министерот Димитров заблагодарувајќи се за возвратната посета, која е, рече, прва по 16-тина години на дански министер за надворешни работи на Македонија, ја нагласи важноста на поддршката од оваа земја за нашите стратешки цели.
-Важна ни е поддршката од Данска за нашите НАТО и ЕУ аспирации, затоа што Данска е една од земјите што можат да бидат модели од кои можеме многу да научиме како ја организирале својата економија, правосудство…Разговаравме за процесот на пристапување дека треба да бидат земени предвид индивуидуалните постигнувања на земјата кандидат и тоа да биде основното кога ќе се нпоси политичка одлука дали да се оди напред или не. Тоа е за нас исто така многу важно, рече министерот Димитров.
На средбата покрај за реформите за пристапување кон ЕУ и НАТО, станало збор и за случајот со поранешниот премиер Никола Груевски, а биле разменети мислења и за унапредување на билатералната соработка во повеќе сфери од заемен интерес, како и за состојбите во регионот.