Наставата во четирите основни училишта во Куманово „Вук Караџиќ“, „Христијан Карпош“, „Наим Фрашери“ и „Бајрам Шабани“ денеска се одвива редовно во затоплени училници, откако надлежните од општина Куманово се договорија со фирмата добавувач од Струмица да обезбеди дополнителни колични на нафта соопштија, одговорните од секторот за образование во општината.
– Во овој период завршува договорот со фирмата која досега испорачуваше нафта, а наредниот вторник ќе потпишеме договор со друга фирма која ќе доставува нафта за училиштата до крајот на учебната година. Сега, за овие денови, додека поминат законските рокови, договоривме со добавувач од Струмица да обезбеди 15 тони нафта и ќе нема проблеми со затоплувањето во сите училишта, изјави раководителот на секторот за образование Жика Крстевски.
Додаде дека не се задоволни од досегашната фирма добавувач, која како што рече не доставувала навремено, доволни количини на нафта и затоа вчера имало проблеми со затоплувањето и четирите основни училишта работеле со скратени часови.
– Со новата фирма која од среда треба да започне со испорака на нафта се надеваме дека нема да имаме вакви проблеми. До крајот на учебната година очекуваме навремено да биде испорачана потребната количина нафта, изјави Крстевски.
Проблемот со затоплувањето на училиштата кои користат нафта се провлекува од почетокот на второто полугодие. Во Куманово дел од училиштата користат гас за загревање, дел од подрачните училишта се затоплуваат на огревно дрво и таму според надлежните од секторот нема проблеми со затоплувањето. Осум училишта во градот се загреваат на нафта.