Потпретседателката на СДСМ, Фросина Ременски, преку својот Фејсбук профил се обрати до Македонскиот полициски синдикат. Нејзиниот статус ви го пренесуваме во целост:
„Ало, Македонскиот полициски синдикат? Дали вие како синдикат или некој од МВР ќе излезе да им објасни на полицајците, бранителите, дека нивните решенија за бранител се тоалет хартија, а не документ што до пред некоја година им овозможуваше одредени бесплатни услуги во образованието и здравството!
Во здравството тие не важат повеќе!
Дали вие како синдикат или некој од МВР ќе излезе да им објасни на полицајците, зошто истото тоа МВР кое работи според Устав и закон, подолго од месец и пол, за своите вработени нема направено уплата за здравствено осигурување во Фондот за здравство т.е., немаат активирана електронска здравствена картичка!
Така што вработен во МВР доколку побара/користи здравствена услуга за себе или за своите (жена, деца), без разлика што се осигурани мора се`, ама баш се` да си плати приватно!
Молчите гласно за се! За скинати униформи, за неисплатени средства, за експресните унапредување на подобните, за експресните деградирања и дисциплинирања на неподобните, за притисоците и уцените, за застрашувањата и местенките! Но, затоа се огласија со поддршка на Буџетот за 2013 година деновите пред Црниот понеделник!
Можеби ќе се досетите дека треба да кажете нешто кога наредните месеци ќе доцни или нема да можат да исплатат плати!
Наравоучение: Купи си синдикат, ако сакаш мир во куќа!“, напиша Ременски на Фејсбук.