Екипите на ЈП „Водовод и канализација“ во текот на изминативе денови извршија реконструкција на два цевковода од водоводната мрежа со пречници од 700 и 400 милиметри кај новиот кружен тек што се формира на улицата „Христо Татарчев“ и булеварот „Србија“.
Поради реконструкцијата, информираат од Град Скопје, без вода останаа корисниците од населбите Ново Лисиче и Аеродром.
– На терен беше извршен ископ и беа поставени нови водоводни цевки и други придружни елементи. Станува збор за многу сложен зафат каков што во Скопје не е изведен во последниве 20 години. Оваа реконструкција ќе ги олесни евентуалните идни интервенции на водоводната мрежа, доколку за тоа се јави потреба, а ќе придонесе и за поквалитетно водоснабдување во овој дел на градот, соопшти Град Скопје.
Оттаму информираат дека по завршувањето на интервенцијата е нормализирано водоснабдувањето во населбите Ново Лисиче и Аеродром и упатуваат извинување до граѓаните за потешкотиите со кои се соочија поради прекинот во водоснабдувањето.