Јавното претпријатие Македонија пат денеска започна со обнова на регионалниот пат Тетово – Гостивар со вкупна должина од околу 20 километри.
Според директорот на претпријатието, Гајур Кадриу, на овој пат гравитираат над 100.000 луѓе, а подолго време тој е оставен без соодветно одржување и е во многу лоша состојба.
Обновата на стариот пат Тетово – Гостивар ќе се одвива во две фази. Во првата е предвидена реконструкција на 11 километри во траење од 12 до 25 денови во зависност од временските услови. Втората фаза дополнително ќе треба да се прецизира на ниво на претпријатието.
– Вкупната вредност на оваа инвестиција изнесува над еден милион евра, рече Кадриу.
Стариот пат Тетово-Гостивар започнува од тетовската приградска населба Мала Речица, минува низ Боговиње и Врапчиште – Неготино, а завршува во Гостивар.