Реконструирана атмосферската канализациска мрежа на дел од булеварот „Киро Глигоров“ со што проточноста на атмосферските води ќе се зголеми двојно.
Оваа локација на булеварот беше посочена како една од десетте црни точки во градот кои редовно се поплавуваа во текот на обилните врнежи ова лето.
Како што информираат од Град Скопје најпрво била извршена реконструкција на постојниот атмосферски колектор кај објектот „Бриколаж“, при што биле вградени полипропиленски цевки, со профил Ф 800 милиметри, во должина од 57 метри. Со овој зафат било извршено исправање на атмосферскиот колектор којшто претходно имал две прекршувања под агол од 90 степени.
– На јужната и северната страна на булеварот „Киро Глигоров“, кон подвозникот, поставени се решетки од монолитен бетон. Моноблоковите се странично армирани и бетонирани со димензија РД 300 милиметри, во должина од 7,3 метри на јужната страна во правец од Аеродром кон Автокоманда, а во правец од Автокоманда кон Аеродром во должина од 5,3 метри. На северната во должина од 5,25 метри на потегот од Аеродром кон Автокоманда на крајната десна лента пред семафорите кај „Фершпед“, а во правец од Автокоманда кон Аеродром на крајната десна лента во должина од 3,25 метри. Тие се приклучени во шахтите на постојниот атмосферски колектор Ф 1.200 милиметри, се наведува во соопштението на Град Скопје.
Функцијата на моноблоковите, појаснуваат од градот, е да ги прифатат атмосферските води пред тие да се слеат во најнискиот дел на подвозникот и да го поплават.
Реконструкцијата на булеварот ја извршија екипи на Град Скопје на ЈП „Водовод и канализација“.