Отстапувања во однос на квалитетот на водата за пиење во однос на бактериолошкиот состав во водоснабдителните системи во руралните средини од Куманово, покажуваат резултатите од испитувањата што ги спроведувааат надлежните екипи од кумановскиот Центар за јавно здравје.
Од проверени 420 примероци вода, кај 41 е докажано присуство на бактеријата ешерихија коли. Според специјалистот за хигиена од Центарот за јавно здравје, епидемиолог Мимоза Величковска, отстапувања во однос на бактериолошкиот квалитет се јавуваат од причина што во ниту еден водоснабдителен објект, во ниту еден водовод во руралната средина не постои дезинфекција на водата за пиење.
– За разлика од водата во градскиот водовод, каде што е крајно безбедна бидејќи секогаш се врши пречистување и дезинфекција, во руралната средина се соочуваме со проблемот со отсуство на дезинфекција на водата. Со водоводите во овие средини не управува комунално претпријатие, туку обично е задолжено лице од месната заедница, кое исто така, е корисник на таа вода и тоа се сведува, пред се, на техничко одржување, изјави Величковска.
Според Величковска, бактеријата ешерихија коли обично се јавува како последица на нередовно чистење на резервоарите, непостоење на заштитни водоводни зони, како и пристап на диви животни. Квалитетот и безбедноста на водата за пиење во руралната средина во Куманово, но и во Старо Нагоричане, Липково, Ранковце и Крива Паланка се следи според годишната програма на Центарот за јавно здравје. Согласно програмата, се следи водоснабдувањето во руралните средини од локалните селски водоводи и од јавните чешми, онаму каде не постојат водоводи.
Од Центарот за јавно здравје посточија дека од Североистичниот плански регион од руралните средини единствено во општините Ранковце и Крива Паланка одржувањето на водоводите е на професионално ниво, бидејќи за нив се грижи јавно комунално претпријатие, и таму оваа година се уште не регистирале бактериолошки неисправен примерок.