Неодамна одржаниот референдум беше тема на денешната средба на министерот за надворешни работи Никола Димитров со амбасадорот Јан Петерсен, шеф на Набљудувачката мисија на ОБСЕ/ОДИХР за неговото спроведување.
Димитров, како што соопшти Министерството за надворешни работи, изрази благодарност за работата на набљудувачката мисија ОБСЕ/ОДИХР за референдумот во Република Македонија и го повтори историското значење на плебисцитот кој е од огромна важност за иднината на земјата и нејзините стратешки определби за интеграција во НАТО и ЕУ.
– Министерот Димитров ја потенцираше важноста од набљудувањето на Референдумот од страна на ОБСЕ/ОДИХР и ја реафирмираше подготвеноста на Република Македонија за продолжување на долгогодишната соработка со ОДИХР, а особено во насока за подобрување на сите аспекти на Законот за референдум и вкупно на нашиот изборен систем, се вели во соопштението од МНР.
Амбасадорот Петерсен се заблагодари за соработката која ја оствари Набљудувачката мисија со Министерството за надворешни работи и со другите институции за реализирање на нивната мисија и ги пренесе ставовите од прелиминарните наоди и заклучоци за процесот на Референдумот.