Жителите на Општина Карбинци можат да го користат мостот на реката Брегалница меѓу селата Долни Балван и Таринци. Сообраќајната полиција денеска и официјално одобри возилата и граѓаните да се движат по него, бидејќи во изминатите девет месеци мостот интезивно се реконструираше.
Градоначалникот на Општина Карбинци, Зоран Минов информира дека инвестицијата била во висина од 19 милиони денари.
– Благодарение на Владата ги добивме овие средства и направивме реконструкција на мостот на реката Брегалница, кој ги поврзува сите населени места во нашата општина со регионалниот пат Штип-Кочани. Во изминатите месеци поради реконструкцијата граѓаните мораа да кружат, односно да патуваат до Штип, а потоа да се приклучат на овој регионален пат, појасни Минов.
Тој смета дека со пуштањето на мостот на реката Брегалница се реализираше еден стратешки проект и очекува во текот на 2015 година да се асфалтира и патот меѓу селата Аргулица и Борилчево, со што Општина Карбници и директно ќе се поврзе со општината Чешиново-Облешево.
