Во просториите на локалната самоуправа на општина Кратово се одржа првиот состанок на локалниот совет за превенција на општина Кратово за 2018 година.
Состанокот се одржа под водство на градоначалникот на општина Кратово, Љупчо Бојаџиев, а присуствуваа: началникот на одделение за полиција Зоран Јовановски, началникот на отсек за превенција при СВР Куманово, Виолета Богдановска и претставници од Полициска станица од општа надлежност Кратово, од Територијалната противпожарна единица, шумската полиција, Центарот за управување со кризи, Дирекцијата за заштита и спасување, ЈП Македонски шуми и од Ловечкото друштво.
На седницата на локалниот совет за превенција станало збор за превенција од пожарите кои се јавуваат во летниот период.
– Присутните главно дискутираа за начините на заедничкото превентивно дејствување на сите надлежни институции во случај на пожар како и за мерките за превенција за да не дојде до вакви состојби. Превенцијата е еден од најважните начини на дејствување, бидејќи најдобро е навреме да се спречат одредени состојби, а не потоа да се пресметуваат предизвиканите штети, независно дали се од човечко невнимание или се последица на природни непогоди, информираат од локалната самоуправа на општина Кратово.