Во завршна фаза се преговорите за владината реконструкција, а по 1 мај премиерот Заев најави дека ќе ги соопшти промените во владиниот состав. Тој не открива кои партии ќе влезат во владината коалиција со образложение дека одлуката зависи од раководните органи на партиите.
-Течат разговорите и преговорите, јас се надевам дека овој викенд ќе привршиме. По првомајските празници ќе ги соопштам пред јавноста промените во владиниот состав, а потоа и соодветно за промените на директорските места во одредени институции, рече Заев и додаде дека сè уште не се знае кои партии ќе влезат бидејќи органите и телата на сите партии ќе донесат одлуки за тоа што разговарале со претседателите на партиите.
Засега е познато дека Турската демократска партија станува дел од владината коалиција, како и двете крила на движењето Беса, откако премиерот Заев потврди дека преговара со Беса на Билал Касами, но и со крилото предводено од Африм Гаши.
Галена Николовска-Ризвановиќ
