Во раните утрински часови денеска СВР Куманово во содејство со ветеринарна и ловна инспекциска служба, а врз основа на судски наредби изврши претреси во 12 домови и во Ловното друштво „Буковац“, при што се запленети и одземени 24 ловни пушки, 3 пиштоли, поголема количина на муниција, маскирни униформи, едно возило со кое е извршен транспортот на отстреланите диви свињи, како и месо од разновиден дивеч, со сомнение дека се работи за диви свињи, див зајак и срна која што со закон е забранета за лов.
Кумановската полиција по добиени оперативни сознанија дека во среднината на минатиот месец кај месноста викана „Мати Камен“ или „Вучји Колиби“, во атарот на село Сакулица, кратовско, е извршено масовно сотирање на дивеч, изврши проверки при што е потврдено дека Ловното друштво „Буковац“ од Кратово за 16.12.2012 година издало дневни дозволи на две групи од по 10 ловџии. По завршување на ловот истите пријавиле дека отстрелале само една дива свиња, како што е предвидено според законските прописи, меѓутоа според доказите со кои располага СВР Куманово, се работи за отстрел на осум диви свињи.
Во овие криминални дејствија, соопшти денеска МВР, се инволвирани и полициски службеници од Полициските станици во Кратово и во Куманово, кај кои исто така е извршен претрес и се приведени како и сите останати сторители, за што е запознаен и Секторот за внатрешна контрола и професионални стандарди при МВР.
СВР Куманово работи на целосно расчистување и документирање на настанот, по што ќе биде изготвена кривична пријава за „незаконит лов“, а сторителите ќе бидат предадени во Основно јавно обвинителство Куманово.
