Во акциска контрола на служебниците од полициското одделение Галате, за откривање на лица кои непријавено престојуваат или работат на подрачјето во гостиварските села Дебреше и Неготино-Полошко, утрово се откриени петмина државјани на Република Албанија, информираат од СВР Тетово.
По приведувањето, на лицата на возраст од 18 до 48 години, било утврдено дека четворица од нив поседувале документи за идентификација, а едниот бил без документи. Во земјава работеле како аргати по полошките ниви.
Странските државјани, по кусото задржување, предадени се во Полициската станица Гостивар, а потоа за натамошна постапка во Отсекот за прекуграничен криминал, миграции,странци и реадмисија.
Изминатиов викенд, во слична акција, во Гостиварско, откриени беа и депортирани 12 албански државјани без регулиран престој.
