И во следната учебна година училиштата во општина Радовиш сами ќе го спроведат тендерот за превоз на учениците, а Општината од учебната 2019/2020 година ќе го организира превозот.
Тоа е договорено на заедничката средба на градоначалникот на Радовиш, Герасим Конзулов и директорите на училиштата.
На средбата се разгледувале проблемите со кои се соочуваат во организирањето на превозот на учениците и при тоа е констатирано дека не е доволен бројот на наставници, кои имаат лиценци за вршење јавни набавки.
За надминување на овој проблем, со кој се соочуваат училиштата, но и општината, градоначалникот Конзулов нагласи дека се упатени уште двајца вработени од општината на обука за добивање лиценци за јавни набавки, а им сугерираше и училиштата да упатат и свои вработени на обуки.
– За јавна набавка од над 130 илјади евра постапката е 45 дена плус деновите за подготовка на тендерската документација, така што и при најповолни услови без жалби, тендерот би се реализирал дури во октовмри, истакна градоначалникот на Радовиш, Герасим Конзулов.
Затоа е заклучено уште оваа учебна година училиштата сами да го спроведат тендерот за превоз на учениците, а идната година општината ќе ја преземе и оваа јавна набавка за нормално одвивање на образовниот процес.