Министерството за локална самоуправа (МЛС) ги прави сите напори да обезбеди нормално функционирање на Центрите за развој во осумтте плански региони, бидејќи се идентификувани како значајни субјекти, кои можат да придонесат за регионалниот развој во Македонија преку развивање на проекти со значаен импакт во споменатите територијално-просторни целини и за надминување на дисбалансите што постојат во државата.
Ова денеска го истакна државниот секретар во Министерството за локална самоуправа, Билјана Цветановска-Гугоска, која заедно со раководителот на Секторот за правни и општи работи во министерството, Сузана Најкова престојуваше во работна посета на Центарот за развој на Југозападниот плански регион.
Државниот секретар информираше за престојните активности што се прават во Министерството за локална самоуправа, за заживување на регионалените центри за соработка со бизнис заедницата, кои преку поддршка на УНДП и Владата треба да овозможат отварање на нови бизниси преку поддршка на домашните и странски инвеститори.
Раководителот на Центарот за развој на Југозападниот плански регион, Мирјана Лозаноска ја информираше Цветановска-Гугоска за тековните проекти што се имплементираат од страна на ова регионално тело, како и за потешкотите со кои се соочува, а за кои, со цел да се надминат, е потребна поддршка од Министерството за локална самоуправа.
– Со цел да се надминат проблемите во функционирањето на Центрите за развој во тек на подготовка е документ во кои се предложени неколку модели на финансирање, преку кои треба да обезбеди нивна одржливост во понатамошниот период. Се надеваме дека Владата ќе прифати соодветен модел и преку измени на Законот за рамномерен регионален развој ќе овозможи нормално функционирање на центрите за развој со оглед на постојните проблеми со кои тие со соочуват за нивно тековно работење, вели претседателот на Југозападниот плански регион, Стојан Савески.