Елизабета Ристеска, координаторката на проектот за воведување на примарно селектирање и собирање на ПЕТ пластични шишиња во градското подрачје на Кичево, посочи дека се собрани 2.224 килограми ПЕТ отпадна амбалажа, со што се заштедени 4.226 литри сурова нафта и 5.560 килограми помалку емисија на СО2 во воздухот.
Проектот, што траеше од први јануари минатата година до 30 април годинава, беше спроведен од страна на Здружението Центар за развој на заедницата во Кичево, со финансиска помош на Глобален еколошки фонд програма за мали грандови на Македонија.
Ристеска рече дека целта на проектот бил едукацијата и подигнување на свеста кај учениците, родителите, но и на сите граѓани на Кичево, колку е значајно од еколошки аспект да се собере, селектира и рециклира ПЕТ пластичниот отпад.
– Формиравме два тима од по двајца едукатори од мешан етнички состав, планиравме и успеавме да ги вклучиме сите пет училишта од градското подрачје. Од собраните и продадени 58.500 пластични шишиња е остварена финансиска корист од 16.600 ден од кои 70 отсто за училиштата а 30 проценти за Центарот за развој на заедницата во Кичево, наведе Ристеска.
Овој проект ќе продолжи и натаму, но без финансиска подршка од фондот.
Новина е тоа што за проектот појавиле интерес да се вклучат и училиштата од руралните средини на Кичево, со што се покажува дека целта е остварена.