Својата кандидатура и програма за престојните локални избори денеска ја презентираше и Васил Ристески, независниот кандидат за градоначалник на Охрид, поддржан од Социјалдемократската унија.
– Сите досегашни градоначаници на Охрид, кандидарани од големите партии го покажаа своето знаење и умешност во водењето на градот. Очекувам овојпат граѓаните на Охрид на денот на изборите на миг ќе ги заборават партиите и ќе се определат за личност која е експерт токму во областа на развојот на општеството и урбаните средини, личност со богато искуство во својата кариера, истакна Ристески.
Тој нагласи дека актуелната состојба во која се наоѓа Охрид, град во кој владее сивилото, во кој царува безнадежноста на граѓаните кои користат секоја шанса да заминат на друго место за да обезбедат егзистенција, му дава поттик да се кандидира за градоначалничката функција и да ја побара довербата на граѓаните.
– Ги повикувам моите противкандидати на излеземе на дебата или дуел пред граѓаните, за да видиме кој е кадарен да го извлече градот од сивилото и да ја врати живоста на чаршијата, со луѓе со насмевки на лицата и кои својата перспектива ќе ја гледаат тука со сопствениот град, а не на друго место, истакна Ристески.
Ристески најави дека во рамки на можностите ќе ги презентира основите на неговата програма која ќе е отворена на увид за сите граѓани, притоа закажувајќи и повеќе средби со одредени категории граѓани заради запознавање со нивните секојдневни проблеми.