Претседателот на Собранието Талат Џафери денеска имаше средба со амбасадорката на Босна и Херцеговина Лепа Бабиќ.
За време на средбата, како што се наведува во соопштението од собраниската прес-служба, Џафери истакнал дека двете земји заемно се поддржуваат на патот кон евроатлантските интеграции и се силно определени преку соработка во сите области – култура, образование, безбедност…, да дадат значаен придонес кон заедничкото интегрирање во ЕУ и олеснување на меѓусебната комуникација во сите сфери на општественото живеење.
Амбасадороката Бабиќ, стои во соопштението, на средбата главен акцент ставила на подобрување на парламентарната соработка меѓу двете страни и посебен осврт даде на значењето на неколку билатерални договори меѓу Република Македонија и Босна и Херцеговина, кои се во завршна фаза и кои ќе придонесат за подобрување и олеснување на меѓусебната комуникација на двете земји, како и подобрување и интензивирање на економската соработка.
Претседателот на Собранието Џафери истакнал дека ќе се фокусира на парламентарната дипломатија, и во таа насока ќе се работи да се зајакнат директните комуникации на соработка на сите нивоа, со што ќе се придонесе за продлабочување на севкупните пријателски односи.
– Двајцата соговорници се согласија за неопходноста од понатамошна директна и пријателска комуникација меѓу двете страни и изразија надеж дека оваа соработка ќе продолжи и во иднина, се посочува во соопштението.