Спикерот на Сенатот на Канада, Ноел Кинсела денеска ја посети општина Тетово и со градоначалничката Теута Арифи зборуваше за повеќе теми како образованието, вработувањето на младите и можноста за канадски инвестиции во Македонија.
– Канада и Македонија секогаш имале одлични односи. Во Канада има многу луѓе што дошле од Македонија и многу придонеле за канадското општество, но јас сум многу задоволен што тие не ја заборавиле државата од каде потекнуваат. Канада исто така е мултикултурна и двојазична држава и навикнат сум да комуницирам на два јазика така што денеска многу лесно се прилагодив на употребата на јазици при посетата, изјави Кинсела.
На средбата станало збор за образованието и особено за креативните начини за справување со невработеноста пред се на младите.
– Глобалната економија подразбира младите да работат во најмалку три земји во текот на нивната кариера, а таа мобилност ние треба да им ја овозможиме на начини што не биле практикувани во минатото, рече Кинсела.
Градоначалничката Арифи, како што рече, го информирала дека од општината и од Македонија има дијаспора во многу земји при што голем дел од нив се враќаат и инвестираат во земјата.
– Една од целите на нашата посета е можноста за канадски инвестиции и тоа не само од нашите државјани што потекнуваат оттука туку воопшто да дојдат и да инвестираат во Македонија, но истовремено и да научат од резултатите што ги постигнувате на полето на мултикултурализмот. изјави претседателот на канадскиот Сенат.