Со девет гласа „за“, без против и воздржани Предлог законот за лобирање помина на собраниската Комисија за политички систем и односи меѓу заедниците во прво читање.
Заменик министерот за правда, Агим Нухиу, на седницата ја истакна потребата од донесувањето на овој закон, кој е со европско знаме и ја образложи неговата содржина. Законот, како што појасни Нухиу, се состои од 38 члена во 9 поглавја и го регулира лобирањето на транспарентен и чесен начин.
– Според законот, со внатрешни акти ќе се определува процедурата, поточно, правилата каде што се регулира идентификацијата на лицата кои што имаат реализирано контакти со институциите, процесот на одобрување и изменување на политиките односно програмите, законите или подзаконските акти или другите акти кои што опфаќаат објавување на податоците на идентитетот на сите учесници во овие процеси, појасни Нухиу.
Пратеникот Панчо Минов од СДСМ се надоврза на заменик министерот Нухиу и истакна дека овој закон за лобирање е од општествено значење за остварување на функциите на законодавниот дом, од аспект на правилно однесување во процедурите на подготовка, расправа и одлучување, односно гласање во донесувањето на законите во Парламентот.
Пратеничката Благица Ласовска, изјави дека законот се носи доцна но никогаш не е доцна за некои нешта да бидат појасни. Таа не се согласи со изјавите на министерот Нухиу, дека јавната свест за овој закон не е на високо ниво.
– Не знам дали овој закон ќе го сфатиме како лобирање, или, како специјален третман на пратеници кон пратеници или надворешните лобисти во однос на лобирање за смена на името по неуспешен референдум во парламентот, рече Ласовска.
Снежана Калеска Ванчева од СДСМ истакна дека широко во општеството е распостранет неформален начин на лобирање кој е тесно поврзан со корупцијата
– Ако имаме општествено политички консензус треба да дискутираме за конкретни механизми како лобирањето да го ставиме во законска рамка која не треба да биде премногу строга бидејќи станува збор за лобирање, да има доволно слобода но, и доволно законска рамка, која јасно ќе укажува дека сме развиле процес на развивање ефикасни и ефективни комуникации со оние кои што имаат моќ на одлучување, нагласи Калеска Ванчева.
Според неа, овој закон има одлична основа и ги инкорпорира препораките од Греко, експертите и Европската Комисија.
Пратеничката Гордана Силјановска Давкова, од друга страна, истакна дека овој закон не може да оди со европско знаме, бидејќи во европски рамки може да наброиме само неколку држави во кои постојат закони за лобирање.
– Овој закон не е појава која што е општо прифатена, туку има и студии, дека во многу европски држави, на овие закони се гледа со дилема, бидејќи се смета дека се озаконила опасноста од корупција, криминал и влијание врз претставничките тела, образложи Силјановска Давкова.
По репликите поголемиот дел од пратениците беа согласни дека овој закон подробно ја дефинира законската рамка и ингеренциите на лобистите.
Предложениот закон содржи одредби со кои лобирањето се регулира ориентирано кон принципите на отвореност, транспарентност, чесност, интегритет и заштита на угледот на институциите и лицата кај кои се лобира.
Предвидени се балансирани обврски во обезбедувањето на информациите кои се објавуваат за лобирањето и проактивност на институциите во објавување на податоци, заради зголемување на транспарентноста по однос на лицата кои би можеле да влијаат врз процесите на подготвување, донесување и изменување на јавни политики односно програми, закони, подзаконски или други општи акти, со цел да се превенира прикриеното лобирање.