Социјалдемократската Унија на Македонија (СДУ) синоќа пред своите приврзаници во Свети Николе и во Штип ги промовираше кандидатите за градоначалник и за советници.
Пред граѓаните и симпатизерите во Свети Николе се претстави младиот спортист Никола Давчев, носител на листата за советници, а истиот ден, во Штип се претстави кандидатот за градоначалник, искусниот и признат бизнисмен Мијалче Поп Андонов.
Поп Андонов во обраќањето го пренесе своето богато искуство, како гаранција и темел на кој смета дека ќе биде изграден неговиот концепт на делување, доколку на претстојните избори биде избран за нов штипски градоначалник. Тој смета дека овој град треба да си ја врати централната позиција, која што некогаш ја имал во источна Македонија.
– Моето долгогодишно искуство и работење ме научија дека за да се има успех, најважно од се е да ги признаеме успесите на другите и врз база на тоа да ги градиме и своите. Не смееш да делуваш самоволно, идејата треба да ја развиваш на база на заедничка соработка, сугестии и мислења, рече Поп Андонов.
Даде ветување меѓу другото дека ќе го врати сјајот на славното Ново село и тамошната црква „Успение на Пресвета Богородица“, но и обнова на фасадата на училиштето во кое работел Гоце Делчев.
– Почитувани Штипјани, ви предлагам да излезете на изборите на 24 март, да го дадете гласот за оној што мислите дека е најдобар, а јас мислам дека Мијалче Поп Андонов е најдобар и треба да го заокружите бројот 18. Со неговиот избор ќе добијат и граѓаните на Република Македонија и граѓаните на градот Штип, оцени претседателот на СДУ, Чедо Николовски.