Лица со Даунов синдром и дизајнери денеска ќе изработуваат новогодишни честитки на предновогодишна работилница во Центарот за дизајн и иновации „Јавна соба“.
Честитките што ќе бидат изработени под менторство на модните дизајнери Ирина Тошева и Олгица Ѓоргиева и графичкиот дизајнер Емилија Мишова Старова ќе бидат изложени за јавноста и објавени на социјалните мрежи.
Настанот е во организација на „Јавна соба“ и Моден викенд Скопје, со помош на активистките Марија Матовска и Росица Колева кои долги години се занимаваат со поддршка на лицата со даунов синдром. На работилницата ќе учествуваат и студенти од Факултетот за арт и дизајн при Европскиот универзитет од насоките за моден и графички дизајн.
– Покрај тоа што сакаме да им ги разубавиме празниците, пред се сакаме уште еднаш да покажеме дека лицата со Даунов синдром се многу креативни, активни и истрајни во работата како и многу други деца, и доколку им се пренесат вистинските вештини од страна на професионалци можат да придонесат многу за сопствениот и развојот на целото општество, соопштуваат организаторите на работилницата.
