Пратениците Владимир Ѓорчев и Џеват Адеми, ќе учествуваат на Зимската сесија на Парламентарното собрание на ОБСЕ, што се одржува денеска и утре во Виена, Австрија.
Како што соопшти Собраниската прес-служба, во рамките на Зимската сесија ќе се одржат одделни седници на трите комисии на ПС на ОБСЕ, седница на Постојаниот комитет, како и генерална дебата на тема: „Состојбата во Сирија, Мали и Северна Африка“.
Се очекува пред учесниците на сесијата да се обратат Барбара Прамер, претседател на Австрискиот парламент, Ламберто Заниер, генерален секретар на ОБСЕ, Виачеслав Јациук, специјален претставник на министерот за надворешни работи на Украина и претседавач со ОБСЕ, Кнут Волебек, Висок комесар на ОБСЕ за национални малцинства, Дуња Мијатовиќ, претставник на ОБСЕ за слоботата на медиумите, Јанез Ленарчич, директор на Канцеларијата на ОБСЕ за демократски институции и човекови права (ОБСЕ/ОДИХР) и други високи претставници на ОБСЕ и експерти.