Пожарот што во неделата избувна во близина на ресенското село Арвати, на потегот спрема селата Брајчино и Сливница е ставен под контрола, информира денеска командирот на Територијалната противпожарна единица Ресен Ванчо Илиевски.
Екипи на ТППЕ – Ресен и на јавното претпријатие „Македонски шуми“ од Ресен, кои учествувале во гасењето се уште се на терен и контролираат да не дојде до повторно активирање, бидејќи, според Илиевски, се работи за голем и непристапен простор од 300 хектари пасишта, дабова и букова шума.
– Пожарот е под контрола. Неговото гасење одеше отежнато бидејќи се работи за огромен и недостапен простор. На тоа место бил Францускиот фронт за време на Првата светска војна и има многу пешадиска муниција, којан претставува опасност за луѓето. Пукаат куршуми и бомби, а пронајдена е и една граната, за што е известена Дирекцијата за заштита и спасување, изјави Илиевски за МИА.
Според него, нема опасност од опфаќање на куќи и други објекти, но причинета е голема материјална штета, која дополнително ќе се утврдува.
– Опожарени се огревни дабови и букови дрва. Штетата дополнително ќе се утврдува, истакна Илиевски.