Екипите на територијалната противпожарна единица од општина Ранковце изминатите два дена интервенирале четири пати, а двe од интервенциите биле на големиот пожар во селото Герман.
Командирот на територијалната противпожарна единица од општина Ранковце, Раде Ивановски, информира дека во селото Герман два дена гаснеле пожар во Герман каде горела борова шума.
– Од човечко невнимание запалена беше борова шума во Герман каде за гасење на пожарот побаравме помош и од јавното претпријатие „Македонски шуми“, шумското стопанство „Осогово“ – Крива Паланка кои стопанисуваат со шумите во овој реон. Пожарот се разгоруваше повеќе пати, од ноќта на седми и денот, во понеделникот, а опожарени се вкупно 20 хектари бор и мала површина букова шума, изјави Ивановски.
Според него, причина за пожарот најверојатно е човечка негрижа, а полицијата работи на пронаоѓање на виновникот за пожарот.
– Имавме интервенции и во село Ветуница каде од спој на електрична инсталација се запали стрниште, а во село Псача се запали приватен објект-барака, како и незначителна површина детелина, додаде Ивановски.
На територијата на општина Ранковце од почетокот на годината досега се случиле вкупно 35 пожари.