Со поставување спомен плоча на тетовското Кале посветена на бранителот Блашко Толев од Неготино, Одборот на бранители денеска ја одбележа 14 годишнината од неговото загинување.
Толев како војник на АРМ загина на денешен ден за време на конфликтот во 2001-та година на месноста Сидол над Калето. Со минута молчење и полагање свежо цвеќе на спомен плочата почит на загинатиот бранител му оддадоа делегациите на Одборот на бранители, Армијата на република Македонија, општинсакта организација на СДСМ Тетово и Народното движење на Македонија.
– Со само 20 години Блашко како пример на неговата генерација и ја одреди цената на љубовта кон татковината. Тој иако веќе беше го отслужил воениот рок доброволно за одбрана на таковината остана на висина на задачата положувајќи го животот за наше подобро денес, рече претседателот на Одборот на бранители Марин Најдов.
Најдов посочи дека како Одбор на бранители ќе продолжат со своите активности за редовно чествување на загинатите бранители на местата каде се случиле самите настани, искрена и сесрдна помош за семејствата на загинатите и ранетите бранители и градење на патриотизмот кај помладите генерации на заеднчки основи без непотребни поделби.