Во средното училиште „Перо Наков“ во Куманово, лоцирано во поранешната касарна во кумановско Бедиње, денеска беше поставен камен-темелникот на новата училишна спортска сала.
На почетокот на изградбата присуствуваа вицепремиерот за европски прашања Арбр Адеми, министерот за образование и наука Пиштар Лутфиу, претставници на општините Куманово и Липково, наставници, ученици и родители.
– Салата „Перо Наков“ е во фаза на изградба. Училишната спортска сала во Куманово е модел 1, односно со површина од 650 метри квадратни и со планирана вредност од 24 милиони денари. Спортската сала ќе биде комплетно опремена со спортска опрема, со гардероба, санитарни јазли и тушеви, изјави министерот Лутфиу. Додаде дека салата треба да биде завршена до средината на 2018 година.
Тој нагласи дека училишната спортска сала во СОУ „Перо Наков“ е дел од проектот за изградба и опремување на 145 училишни спортски сали во основните и средни училишта во Македонија.
Во средните училишта, како што рече, завршени се 25 училишни спортски сали.
Заменик-директорот на училиштетто Ељхам Адеми информираше дека 480 ученици следат настава во ова училиште и додаде оти досега наставата по спорт и спортски активности се изведува во импровизирани простории и надвор. Изрази благодарност до МОН и до општина Куманово кои помогнале при спроведување на процедурата за отпочнување на градбата на оваа спортска сала.