Македонскиот државјанин Ацо Боцевски викан „Циганот кој е осуден на 15-годишна затворска казна за извршено убиство во земјава во ноември 1997 година, а по кој имаше распишана европска потерница, е уапсен во грчкиот град Катерини, објави грчката новинска агенција АНА-МПА.
60-годишниот државјанин на Македонија, по убиството Сеат Ибраими во центарот на Скопје побегна во странство и живеел во Бугарија и Турција.
Согласно судските документи од нашата земја, кривичното дело било извршено во ноември 1997 година, а жртва беше 37-годишен македонски државјанин.
Сторителот тогаш, наводно предизвикал сообраќајна несреќа, а кога жртвата излегла од возилото го нападнал со оружје.
За убиството, една година подоцна бил осуден на 15 години затвор.
АНА-МПА пишува дека уапсениот ќе биде изведен пред обвинител во Солун за да се започне постапката по барањето за негова екстрадиција во земјава.