Непрооден е патот кон кавадаречкото село Рожден, каде висината на снежната покривка е 30 сантиметри.
Од компанијата „Јами“, која кавадаречката локална самоуправа ја избра за зимско одржување на патиштата во општина Кавадарци, истакнаа дека нивната механизација е на терен.
– Во моментов се работи на чистење на снегот на потегот кон селата Бохула и Бојанчиште и очекуваме до крајот на денот и патот кон Рожден да биде приспособен за движење. На некои места од патот кон Бојанчиште и месноста Михајлово снежната покривка достигнува и до половина метар, посочија од компанијата.
Според нив, се работи за јужен снег кој е потежок и ги прави патиштата полизгави, па затоа е и потешко да се истурка.
Нагласија дека засега нема потреба од интервенција со сол на патиштата, која можеби ќе биде неопходна во вечерните часови кога ќе дојде до подмрзнување на патиштата.