Затворениот градски базен нема да работи една недела, почнувајќи од утре се до наредната недела поради тековно сервисно оддржување, информираа денеска надлежните од ЈП „Чистота и Зеленило“ Куманово кое стопанисува со базенот.
Следните седум дена, информираше директорот на претпријатието Сашо Петрушевски, ќе се врши комплетно чистење на базенот.
– Станува збор за редовно сервисно одржување кое по правилата за одржување се прави двапати годишно, а веќе поминаа шест месеци од почетокот на функционирањето. Наредните денови ќе се чисти хемиски и бактериолошки базенот, за да се заштити и со промена на водата да се врати во функција, изјави Петрушевски.
Како што најави во наредните денови во соработка со изведувачите, и подизведувачите ќе се извршат и одредени ситни промени што се значајни за тековно работење на базенот.
– Ги информираме граѓаните и пливачките клубови дека од од 1 до 8 февруари, односно од среда до следната среда нема да работи затворениот базен, додаде Петрушевски.
Тој информираше дека за пливањето постои голем интерес кај граѓаните на Куманово и дека во овој период формирани се три пливачки клубови, а надлежните најавуваат дека има и иницијатива за формирање на ватерполо клуб.
– Има најава од ватерполо Федерацијата на Македонија дека ќе биде формиран и ватерполо клуб, што беше и интерес на младите од Куманово. Со отворање на базенот сите овие предуслови ќе се исполнат, нагласи Петрушевски.
Сепак, додаде, дека приоритет и примарна дејност на базенот е правилниот психофизички развој на младите луѓе, односно на учениците од основни и средни училишта кои во одредени термини го користат базенот и со надзор на професорте по физичко образование се реализира наставата.