Активната транспарентност во една земја е најголем непријател на лажните вести и дезинформации, а во соседство како Западен Балкан активната соработка на медиумите е клучна како никогаш досега за сузбивање на трендовите на агресивно дезинформирање.
Тоа го истакна министерот без ресор за комуникации, отчетност и транспаретност Роберт Поповски во обраќањето на седмата сесија на 98.РОС-РОТ семинарот посветена на темата „Состојбата со медиумскиот пејсаж на Западен Балкан: Влијанието на дезинформациите и погрешните информации во креирањето на јавноито мислење.
Според Поповски, клучот за заштита од лажните вести и дезинформации е во новинарската професија не само на национално, туку и на регионално ниво, преку саморегулирање и држење до етичките стандарди и вредности. Владите и сите политички субјекти мора да ги поддржат овие стандарди, нагласи Поповски, укажувајќи дека трендот на ширење шокантни вести, дезинформации како на национално, така и на регионално ниво е најголем поткпопувач на демократскитре, реформските и евроатлантските аспирации на регионот.
Според Поповски, состојбата на медиумите во Западен Балкан за жал и покрај сите укажувања според индексот на Репортери без граници може да се опише како загрижувачка или сериозно загрижувачка, а соработката на ниско ниво.
Тој ги повика медиумите во регионот на поголема и поинтензивна соработка во насока, пред се, на запознавање на состојбите во соседните држави, затоа што обединувањето во борбата против лажните вести е една од најдобрите одбрани.
Во одговор на упатените прашања до него за промени на состојбите, меѓу останатото, министерот Поповски рече дека е многу значајно образованието кое треба да создаде атмосфера на медиумска писменост.
Ги повтори и преземените активности и заложбите за реформи во медиумскиот простор, вклучително и во јавниот сервис, и ја повика опозицијата да се вклучи и да го поддржи законот за медиуми што е во собраниска процедура со кој треба да се овозможат промени.
– Апелирам сите политички структури да го поддржат овој закон, бидејќи е поддржан од медиумската средина и од граѓаните и не треба тука политиката премногу да интервенира, наведе Поповски.