„Во изминативе 25 години постигнавме многу, но недоволно. Постигнавме самостојна држава, институции, меѓународно признание. Но не развивме политичка култура на дијалог, за да знаеме да разговараме и со оние со кои не се согласуваме и низ дијалог да дојдеме до решенија. Потребен ни е консензус околу прашања како спорот со името што ни е наметнат од јужниот сосед, концептот на интеркултурализам, или концептот на одржлив развој поврзан со екологијата и заштитата на животната средина. Потребна ни е политичка култура на дијалог помеѓу чинители од различно етничко и политичко потекло, со различна идеолошка матрица. Мора да научиме да се почитуваме како луѓе, како сограѓани, за да обезбедиме стабилност за Македонија и благосостојба за нејзините граѓани,“ рече Лилјана Поповска, пратеничка од ДОМ, на денешната конференција „25 Години Македонија“ организирана од ОМД – Обединетата македонска дијаспора и МЦМС – Македонскиот центар за меѓународна соработка.